رغم الاعتذار.. فنانو مصر غاضبون من ميريام فارس: "غير مقبول"
واصل الفنانون المصريون تغريداتهم وتعليقاتهم الغاضبة من الفنانة ميريام فارس التي صرحت بأنها أصبحت "تقيلة على مصر".
واعتذرت الفنانة ميريام فارس عن تصريحها الصادم، مؤكدة أنها لا تقصد الإهانة لمصر، بل تتكلم في إطار الطبيعي الذي يمر به الفنانون عندما يرتفع أجرهم، فلا يكونوا قادرين على إحياء الحفلات ذاتها.
وعلى الرغم من اعتذارها إلا أن الفنانين المصريين رفضوه، فقال مجدي الهواري: "مش مقبول.. اعتذارك غير مقبول.. مش علشان غلطتي.. لا علشان من أنتِ.. إنتِ خايبة.. أنتِ تبحثين عن عذر والعذر أقبح.. من عدم الطلب عليكي بس للأسف مش فاهمة إن المصريين الفنانين فاهمين الحركات ديه وهما كمان اللي بدعوها.. فاحسن العبي بعيد يا شاطرة".
وتابع: "إحنا مش قد أجرك.. طب شوفي سبب تاني.. إحنا لو عايزينك في شغل حالا أقسم بالله هتيجي ماشية علي رجليك علشان تشتغلي في مصر.. إنتِ بس مش لاقية حجة قوية قولتي أسند على مصر.. الحيطة المايلة اللي فاكرين فنانيها ساكتين".
واستكمل: "طب محرومة إنتِ وجيلك.. أجرك غالي علينا.. في حين إنك ممكن تشتغلي بعشاء فرقتك.. ولا فرقتك كمان معظمها محترمة لأنهم معظمهم مصريين.. أيتها الفاشلة .. نراك قريبًا في حفلة الحديقة الدولية".
وهاجمها أيضًا الشاعر أمير طعيمة والذي قال: "معظم نجوم الصف الأول في لبنان أقاموا حفلات في مصر بعد الثورة زي إليسا ونوال ونانسي وراغب وحتي العظيمة ماجدة الرومي وغيرهم".
وتابع: " أنا وإنتي عارفين الأرقام وإنهم بياخدوا أجر يفوقك بمراحل والفرق الكبير بينهم وبينك.. بلاش مصر يا ميريام، إن مكانش من باب الأدب يبقي من باب الذكاء".
وبعد اعتذار ميريام فارس قال "طعيمة": "الهدف مش شخصي لا سمح الله، الهدف إن أي حد صغير أو كبير يفكر قبل ما يحط كلمة مصر في جملة مفيدة.. رسالتنا وصلت وميريام اعتذرت والموضوع انتهى، جل من لا يخطئ، وإحنا أكبر من إننا نفضل نتكلم في خطأ تم الاعتذار عنه".
وكان المطرب رامي جمال غرد قائلا: "الفنانة اللي بتقول إنها بقت تقيلة على مصر ليا عندها فلوس بقالها سنة والله ادفعيهم الأول يا تقيلة".
