رامي صبري يدخل في صراع جديد مع عمرو دياب.. «أغنية شكرًا بتاعتي»
أثار المطرب المصري رامي صبري جدلًا كبيرًا خلال الساعات الماضية، بعد زعمه أن عمرو دياب أخذ منه أغنية "شكرا" مما أشعل صراعًا جديدًا بينهما.
وعلى الرغم من مشاركة المطرب رامي صبري في تحدي أغنية "محسود" للنجم عمرو دياب، وتبادل الرسائل بينهما لإذابة الصراع المخفي بينهما منذ سنوات، إلا أن رامي جدد الأزمة.
وزعم رامي صبري أن عمرو أخذ منه أغنية "شكرا" بتواطؤ من الملحن والموزع عزيز الشافعي، مؤكدًا على أنه لن يتعامل مع الأخير مجددًا.
وقال رامي صبري عبر حسابه بموقع الفيس بوك عبر منشور مثير للجدل: ولتاني مرة الملحن عزيز الشافعي ياخد أغنية مني وإحنا شغالين فيها، ويديها لفنان تاني، وهو الفنان عمرو دياب بنفس الشكل التوزيعي والموزع، أغنية شكرا كده للي سبنا وأغنية زي مانتي.. لذلك قررت عدم التعامل معه مرة أخرى.
وحذف رامي المنشور بعد دقائق قليلة من نشره، وهو ما أثار ضجة عبر كل مواقع التواصل الاجتماعي ما دفع مؤلف الأغنية تامر حسين للتدخل وتوجيه رسالة غير مباشرة لرامي صبري عن أخلاقيات المهنة، والطرق الحضارية لإدارة مثل هذه الأزمات.
وقال تامر حسين: ردًا على شكرًا والمُهاترات اللى بسمعها، أولاً ليه بنجيب وبنقحم دايماً أسم (عمرو دياب) فى جُملة مفيدة؟ ايه الغرض؟ ثانياً... توقيت البوست لما الأغنية انتشرت وكسرت الدنيا بالتفاعل وإقبال الناس عليها والإشادة بيها يعنى ليه الكلام ده مكنش فى أول يوم مثلاً؟ ده لو فعلاً الكلام على حق.
تابع قائلا: ثالثاً... اللى اتعلمته ومن أدبيات المهنه ولازم الناس كلها تفهمه فكرة الذوقيات، يعنى ايه ؟ يعنى نبارك لبعض نهنى بعض مش نتهم الناس فى عز نجاحهم بالباطل لما أى مُطرب فى الدنيا بتعجبه اغنية المؤلف والملحن بيعملوا (تنازل عن حقوق الإستغلال) للمطرب، طالما ماحصلتش الخطوة دى من زمان تبقى الأغنية ملك الشاعر والملحن لحين إختيار الأفضل وارد جداً تسمع مطرب زميل اغنية من سنة سنتين ولضعف الرؤية الفنية مايتخيلش نجاحها ده اللى بيفرق مطرب عن مُطرب ف سُرعة إتخاذ القرار.
وواصل قائلا: أنا شايف ان فى تجنى على حق المُلحن عزيز الشافعى أدبياً ومعنوياً دى شهادة حق ومش شايف تماماً اى داعى يسمح بالكلام والصراعات دى، وللمرة المليون الناس المُحترمة ما تعلنش مشاكلها فى العلن، عيب فى خصوصيات ما يصحش ندخل الجمهور فيها ونتهم ناس محترمة بالباطل اكيد مش هنزل فويس نوت نستشهِد بيها واحنا (أصحاب الحق ) وربنا يهدى.
واختتم: وأخيراً ياما ناس سمعت اغانى من سنه وسنتين ومكنش ليهم نصيب فيها ما عملهوش اللى بيتعمل ده لما الأغنية تنجح بالعكس فرحوا واتمنوا انها ياريت لو كت أغنيتهم بكل حُب وتقدير وروح حلوة وده بوست بكُل حُب والله عشان معنديش كلام يتقال تانى مش عايزين الموضوع ياخد أكبر من حجمه هى شُهرة ل الأغنية أكتر بس ما بحبش الطريقة دى من الشهرة.
كما علق الملحن الشافعي قائلا: مش هرد بالتفاصيل على كلام الزميل المحترم، عشان لما الواحد يبقى ليه فضل بعد ربنا في نجاح فنان وبيزود رصيده مع الناس، بيعز عليه بعد كدة يقلل منه حتى لو تجاوز.
أضاف: ورغم إن كلامه كله (مالوش أي اساس من الصحة)، أحب دايما اشوفه ناجح وبيكمل اللي عملناه، وبشكره على إستجابته لطلبي وقراري الشخصي الي بعتهوله الصبح من خلال صديقنا المشترك محمد حامد بإننا منشتغلش تاني ونكتفي بنجاحاتنا.
واختتم عزيز رده قائلا: وبعتذر للسادة الصحفيين اللي بيتصلوا بيا مش عايز ادي الموضوع أكبر من حجمه وبكتفي بالبوست ده و بالكلام المحترم اللي كتبه زميلي وشريكي تامر حسين على صفحته عن أغنية شكرا، أما بخصوص زي مانتي فممكن ترجعوا للصديق المشترك محمد حامد و تسألوه وشكرا لحد كدة.
اقرأ أيضا.. حقيقة ارتباط عمرو دياب بالحسناء كارولينا زوبكوفا.. القصة الكاملة للصورة
