أزمة مها أحمد والسقا وكرارة.. تراشق بالألفاظ يخرج عن السيطرة
أثيرت خلال الساعات الماضية، حالة من الجدل والغضب في الوسط الفني بعد أن شنت الفنانة مها أحمد زوجة الفنان المصري مجدي كامل حربًا على الفنان أحمد السقا وأمير كرارة.
وبدأ الأمر بعد قرار الشركة المتحدة في مصر وقف التعامل مع المخرج محمد سامي، مخرج مسلسل نسل الأغراب الذي أثار جدًلا في دراما رمضان.
وتستعرض «الجوهرة» التفاصيل الكاملة لأزمة مها أحمد والسقا وكرارة، والتي ترتب عليها تراشق غير لائق بالألفاظ ما بين الأولى وأسرة السقا وأمير كرارة .
أزمة مها أحمد والسقا وكرارة
كانت البداية مع تعليق مها أحمد، على وقف مخرج مسلسل نسل الأغراب؛ حيث قالت: الحكاية يا سادة نجمين عملوا مسلسل واتنجمت عليهم بنوتة لسة الف باء تمثيل واديتهم على قفاهم وركبت عليهم إلى أن أصبحت بطلة المسلسل.وتابعت: النجم الأولاني بينى وبينه عيش وملح وزماله رشحت في مسلسل بطولته وكان بيقنعنى بدور ولما وافقت بعتولى دور تانى معرفوش، اتهرب منى وموقفش جنبى رغم إن الكل عارف انى زى اخته (ندل) .
واستكملت: أما التانى كان فبداياته يتمنى يسلم عليا ويقولى يا أستاذة ونزلت من نفسى وقلتله مش هنشتغل مع بعض رد وقالى الدور بينادي صاحبه.
واستطردت حديثها: تمر الايام والاتنين يمثلوا وحش أوي وربنا يركب عليهم بنوتة سنة أولى تمثيل وخبرة وهما مخدماتية للاستاذة.
وأثار هذا الهجوم جدلا كبيرًا بين الجمهور؛ حيث استنكر البعض حدة الفنانة المصرية، فيما صُدم أخرون في تصرف السقا وكرارة.
ولم يمر طويلا؛ لتخرج أسرة السقا وتدافع عنه؛ حيث ردت فاطمة السقا على منشور مها أحمد في تعليق، قائلة: أبهرتينى يا مها بأخلاقك العالية وبانك افتكرتى العيش والملح اللى كلتيه فى البيت بتاع الفنان اللى مش عارفة تقولى اسمه بس عرفتى تقولى عليه ندل واللي هو أحمد السقا.
وتابعت: قطع لسان اى حد يقول عليه كده لانه راجل اكرمك ووقف جنبك انتى و مجدى بدل المرة الف.. .. و امير كرارة بردو راجل جدع و محترم للى ما يعرفهوش فى البوست بتاعك ده.
وأضافت: أنا مش شايفة غير كمية الحقد و السواد والشماتة اللى كانو متداريين ورا ابتسامة كدابة معرفش انتى ازاى كنتي بتدخلى بيوتنا الصراحة وانتى ست وحشة كده.
واختتمت تعليقها قائلة: نسيت اقولك السب والتطاول ده بيدل على الاصل.. واحنا بقى ولاد ناس مع اننا عندنا كلام كتير أوي يتقال.
كذلك ردت والدة السقا عبر حسابها على فيس بوك قائلة: كومبارس فاشلة تتطاول وتسب فنانين كبار وتبحث عن الشهرة بطريقة بذيئة.. مهما حاولتي يا كومبارس ليس لك مكان وسط الفنانين.
ومن جانبها، خرجت الفنانة مها أحمد في لايف عير حسابها على فيس بوك لتوضح سبب منشورها.
وكشفت تفاصيل صادمة بينها وبين الفنان أحمد السقا.
وقالت مها أحمد: كلمت السقا وعيطت وقولتله أنا في ظروف نفسية مش كويسة وعندي اكتئاب.
وتابعت: حقيقي هو رحب جدًا وبعدها بكام يوم لقيته كلمني في التليفون وقالي يا مها في دور حلو أوي أنا شايفك فيه.
وقالت: اتفاجئت إني اتبعتلي دور غير اللي اتكلمنا عليه خالص، ومكنش ليّا أي لازمة في المسلسل.
استكملت مها: كان ممكن تقول لأصحابك شغلوا مها.. رحت طبعًا واستغربت جدًا عايزة أكلمه.. كنت قولي إنه دور كومبارس ومش هزعل منك.. مكنش لازم أشحت كويس إنكم مترجمنها على إنها شحاته رغم أني كنت مترجماها على إنها سعي.
وعن أمير كرارة قالت، قابلت زميل تاني.. كنت بشتغل في شركة وكنت بعمل برنامج وهو كمان كان بيعمل برنامج قبل ما يتشهر، ويشوفني يقولي يا أستاذة ونوع من الرقي، وقولت يابت مافيش مشكلة في نوع من العشم، دخلت وقولتله مبروك إيه بقى مش هنشتغل مع بعض، راح باصصلي كده وقايلي الدور بينادي صاحبه طبعًا أنا استغربت للرد، كان ممكن يقولي ربنا يسهل أو حاجة.
واختتمت: بناءً على اللي حصل جالي اكتئاب وعيطت كتير جدًا، خلال تلك الفترة انا تعبت وأخدت أدوية ومازلت باخد الأدوية لحد دلوقت، شئ طبيعي لما ألاقي فيها حاجة بها رد اعتبار ليا، هتكلم وأكتب على صفحتي، وأنا كتبت بصراحة شديدة، ولا بشمت في حد ولا عايزة، ولو عايزة أشمت هشمت في نفسي أني أحسن من ناس كتير وقاعدة في البيت
اقرأ أيضا: فنانة مصرية تهاجم محمد سامي وزوجته: «مي عمر مبتعرفش تمثل»
