«لسه فاكر».. تامر حسني يرد على معاتبة أحمد السقا
حرص الفنان المصري تامر حسني، على الرد على حديث صديقه النجم أحمد السقا، فيما يخص خلافه معه، على خلفية مشاركته في فيلم «الفلوس»، ومعاتبته له عبر إحدى القنوات الفضائية.
تامر حسني وأحمد السقا
وعلّق، عبر صفحته الرسمية على موقع التواصل الاجتماعي لتبادل الصور والفيديوهات «إنستجرام» عبر خاصية الاستوري، على حديث السقا فيما يخص ظهوره في فيلم «الفلوس»، كضيف شرف وكتابة اسمه ضمن أبطال العمل.وأكد تامر حسني، أنه كان يتمنى أن يتحدث له السقا بشكل خاص، ولكن الجمهور من حقه أن يعرف الحقيقة، بعدما وجه أحمد اتهاماته علنًا عبر برنامج «السيرة».
وقال: «حبيبي وأخويا وصديق العمر ونجم الدنيا كلها أحمد السقا، كنت أتمنى إنك تكلمني بيني وبينك لو كنت زعلان من أي حاجة أو فاهم أي حاجة غلط، لإن الحاجات دي لا يمكن تفوتك وأنا كنت أتمنى مكتبش الكلام دا هنا بس عشان بعد كلامك في التليفزيون، الجمهور الكريم بقى ليه حق إنه يفهم الصح».
وتابع: «عشان أفكرك بس، أنت كلمتني وقولتلي خبر في موقع وعليه صورة افتراضية للفيلم وكاتبين إنك بطل في الفيلم، وأنا رديت عليك إن دي اجتهادات صحفية والصورة من تصميم المحبين اللي أكيد فرحوا بالخبر إننا مع بعض، حتى أنا مقولتش إن دي الشركة المنتجة لأنها شركة كبيرة لا يمكن تعمل كدا، لأن الفيلم متباع للخارج والداخل باسم أخوك تامر حسني».
وأضاف: «وأصلًا أفيش الفيلم الرسمي نزل والناس كلها شافته وأنت مش فيه ولا فيه اسمك وكل الأبطال طالعين مرسومين، كان ممكن تزعل لو الكلام دا نزل على صفحتي أو صفحة الشركة المنتجة».
وتابع: «أنا شرحتلك دا من سنة واتكلمنا بعدها مرتين، مرة عيدت عليك في عيد ميلادك والتانية بخصوص برنامجك، لو كنت لسه زعلان كنت هتقولي ساعتها، الفيلم بقاله سنه يا أحمد».
وأكمل: «أخيرًا بقى مستحيل الشركة تروج أو أنا أفوت أو اسمح باستخدام اسمك كبطل للفيلم وأنت مش فيه، لإن دا هيعود علينا كلنا بالضرر لإن الناس هتدخل الفيلم مش هيلاقوا الكلام دا فيبقى احنا كدا بنضحك على الناس وضرينا الفيلم، ولأن أكيد يشرفني إن احنا نمثل مع بعض بطولة مشتركة، لأنك حبيبي بجد ونجم أنا بحبه من قلبي فعلًا».
وعن مشاركته في مسلسل «ولد الغلابة» للفنان أحمد السقا كضيف شرف الحلقة الأولى، قال: «وبعدين يا حاج أحمد لما أنا جيتلك مسلسلك حصل اجتهادات كتير من محبينك الكرام شويه يقولوا المسلسل بطولتنا وشويه يقولوا لا دا ضيف شرف بس وأنت عارف إن عمري ما عملتها وطلعت ضيف شرف غير ليك، دا أنت طلبتني أجي أصور الساعة 8 الصبح كنت عندك في نص ساعة عشان فكرة طلعت في دماغك فجأة وجيت، لإنك غالي عندي أوي أوي فوق ما تتصور».
وتابع: «كنت بفرح باجتهادات محبينك ومحبيني حتى لو صورتي صغيرة أو كاتبين بطولة أو ضيف شرف كل دا مش فارق لإني جيت أخدم صديق عمري وأتمنى أي كلام يصب في مصلحة مسلسل أخويا وينجح ويكسر الدنيا، أنت حبيبي يا أحمد وصديق عمر عشان كدا أنا مش هزعل منك معلش طولت في الكلام لإن برضو زعلك يعز عليّ».
يشار إلى أن النجم المصري أحمد السقا تحدث، خلال مقابلة تليفزيونية، عن خلاف وقع بينه وبين مواطنه الفنان تامر حسني، بسبب فيلمه الأخير «الفلوس».
وقال: «إن تامر حسني تحدث معه كي يظهر كضيف شرف في الفيلم، مستكملًا: «وافقت عشان بردوا الحق يتقال إنه وافق وشاركني في مسلسل (ولد الغلابة) اللي اتعرض في رمضان».
وتابع السقا: «تفاجأت بصورتي على بوستر العمل وهذا الأمر ضايقني وتسبب لي في مشاكل نفسية وعلى مستوى العمل أيضًا، معقبًا أن تامر حسني كان يستطيع أن يلغي الأمر ولكنه تجاهل وتعلل عندما تحدثت معه بأن الأمر يعود إلى الشركة المنتجة والفانز، إلا أنه لو كان كذلك لكان باستطاعته إنهاء الأمر وترضيتي».
وأضاف: «لو تامر حسني قابلني وقالي كلمتين حلوين أقبل اعتذاره، وأنا شخصيًا بطبعي مسامح.. ومسامحك يا تامر».
اقرأ أيضًا: فيديو| انفعال تامر حسني على معجب اقترب من زوجته
